Wie noch dä Wissäwald ä groußi Wissä waa
un d Schwatzbach sauwä war, zum Spieglä klaa ,
wie d Villa drüwwä waa ä gonz uhoomlichs Haus ,
mä noch schbazierä gongä isch än Olläs naus ,
wie noch än Treffpunkt waa äm Kolb säin Käschäboom ,
än därrä Zeit waa ich än Daischbach noch dähoom.

Wie noch dä Schbottblatz drunnä waa beim Waibschdä Wald ,
miä d Naidäschdoiner noch bekempft mit allä Gwalt ,
ä Faht uff Haidlberg waa noch ä Daagesduä ,
miä luschdich ghopft sen üwwä ä väfronzdi Schnuä ,
wie so a Audo waa fo jedän bloß än Droom ,
do waas än Daischbach halt noch ondäscht un dähoom.

Wie unsä Schulhaus waa, was jetzäd s Rothaus isch ,
dä Moschd noch ghääd hot feschd uff jedän Veschbä-Disch ,
wie ämmä Mischdhouf vorräm Haus sich niemond gschdäät
un somsddags häwwä d Leit dä Weg gekäht.
Do waa noch nix geteert, waa alläs Dreck un Loohm.
Sou waas än Daischbach früä, sou waas mol dähoom.

Wie miä beim Ärbsäzopfä fleißich uffäm Feld
än longä Schdundä uns vädient ä Sunndagsgeld ,
wie`s bloß zuä Kärwä waa äm Dorf mol richdich Donz ,
was gonz Besundäs waa ä Schdick vum Hefägronz ,
wie mä noch gschepft hot vun dä Milch dä Roohm ,
habb i än Daischbach gwuhnt un waa aa dott dähoom.

Sou viel aus dennä Johrä sen scho nimmi doo.
Es wärä liewä Leit däbei, i denk oft droo.
Un wonn vun dennä oonä heit vum Himml guckt ,
dät wät sich froorä : " Senn die donn do drunnä gschuckt ? "
Doch undä uns gsaat : Dä waa früä aa net zohm,
än derrä Zeit , wie dä än Daischbach noch dähoom.