Säinäzeit unn heidzudaag

Ä paa vun uns, die wärrä sich noch droo erinnrä kennä,
wie mä vun Sinsä bis hoom gebraucht hot oft ä gonzi Schtund.
I gebīs gään zuu, iech selwä ghää scho aa zu dennä,
die sou ä Streck domols gongä senn, fascht immä aus dem Grund,
um iwän Rühmann unn Moser äm Kino zu lachä,
mol hoddich bsorjä noch eddlichä wichdichä Sachä.
Heid nemmt mäs Audo scho wegä dä kleenschdä Bagadellä
unn rast änd Stadt, obwoll mäs aa än unsäm Laadä keent kaafä,
doch dozu meeßt mä jo noch verri bis äns Voddädorf laafä.
Heid geht halt alläs schnellä.

Wä ischän friä mol uff Zuzähausä niewä gongä?
Hechschdens uff Hoffä, uff Eschlbrunn, uff Waibscht, uff
Neidäschdoi.
Mit Epflbach unn Düänä waa noch wennich oozufongä!
Wonn mä bussiät hot, donn meeglichscht jemond vun dä aignä Gmoi.
Beim Minnädinscht waa ä Fahrrad fo monchän än Segä,
doch was waa donn, wonnīs mool gschneicht hot, bei Hagl, bei Regä?
Wä leßt sich heid noch vum Weddä säin Weg zum Glick väschdellä?
Wä jetzäd bletzlich zu seim Schetzl will, nemmt oofach sein Waarä.
Äm Audo gehts ziegich: fläddä, schmusä, kissä, sich paarä.
Heid geht halt alläs schnellä.

Nadiälich hotts zuä aldä Zeid oft viel zu schaffä gewwä.
Awwä s waa gmiedlich unn ned voll Schtreß wi gegäwäddich
Wonn d Leit vum friä Morjä bis änd Nacht sich äigsetzt hewwä,
uffämä Aggä, dahoom, äm Gschäft - waa mä oowäds fäddich.
Äns Uälaubmachä äm Auslond waa gaaned zu denggä!
Denn säinäzeit waa än ondärrä nix zu väschenggä.
Heid diest mä bis uff Auschtraliä äm Flugzeig uhnä Probellä.
Mä hoots jo! Wonn des ondre kennä, kennä miä des noch bessä.
Wä die Weld noch ned beraist hot, Mensch, den konnsch doch vägessä.
Heid geht halt alläs schnellä.


(Erich Heller,1998)



Datenschutz / Impressum